30 Years Later, Still Secret!
Jan 24, 2025
Kaieteur News- In some places like de USA, dem people deh serious ‘bout history and transparency. Dem seh after 30 years, government papers mus’ come out so everybody could read dem. Deh declassify dem papers, throw dem out to de public, an’ say, “Go ahead, find out wah we bin up to.”
But in Guyana? Eh-eh! Dem papers ain’t declassifyin’. Dem papers like secrets in de confession box—forever sealed!
Dem boys seh de only way we gon know wah happen 30 years ago is if somebody leak it. An’ even dat like finding oil widout Exxon—rare! Guyanese don’t leak t’ings; dem hold it tighter than a miser holdin’ onto a last dollar.
Tek fuh example October 1992, when de PPP/C first come back to office. Dat first Cabinet meeting under Cheddi Jagan mus’ be bin historic! You know Cheddi had to give dem Ministers a good charge. But wah he tell dem? Wah de plans bin? Up to now, de people don’t know. Dem Cabinet minutes lock up tighter than Fort Knox, an’ dat is if dem still exist an’ de termites ain’t done eat dem!
Dem boys seh, wah yuh expect in a country where not even de last Cabinet meeting minutes gon ever see daylight? Over in de USA, dem declassifyin’ t’ings so people could study history. In Guyana, we waiting pon leaks dat does only come when somebody vex or get fire.
Dem boys laugh when dem hear bout “Freedom of Information.” Freedom? Is more like Freedom to Wonder. Dem seh if yuh want to know wah really happen in de past, yuh might as well light a candle, pray, and hope a ghost from dem Cabinet meeting come back to tell yuh.
Dem boys seh, in Guyana, secrets don’t expire; dem does just turn into folklore. Ah wonder if de folklore gon tell we how de first PPP/C Cabinet meeting in 1992 really guh down?
Talk half. Leff half.
(30 Years Later, Still Secret!)
Related
Similar Articles
