Sunday Ain’t Easy No More
Dec 07, 2024
Kaieteur News- Lionel Richie sing how he “easy like Sunday morning.” Dem boys want ask Richie which Sunday he talking bout, because in Guyana, Sunday done lose it ease. Sunday morning now busy like Regent Street on a Friday afternoon when everybody scrambling to buy last-minute things.
Sunday morning used to be quiet. You coulda hear birds chirp, breeze blow, and even Auntie May kettle whistling. But now, Sunday morning sound like Monday rush hour. Car wash open from 6 a.m., like if people planning to show off dem car to dem neighbor as Sunday blessing. Market ram jam before sun hot. You got people pushing wheelbarrow, hollering price, and vendors shouting, “Two-pound fa $500!” Dem trucks nah know no rest. Even Sunday dem blazing down de road.
One time, a man seh he going out early Sunday morning fa some fresh air. He end up in traffic jam. He seh he couldn’t believe he eyes—everybody and dem aunty out early like de world gon end Monday. Mall open, people brunching and lunching like is a wedding celebration.
And guess what? Afternoon worse. People seh Sunday afternoon is de new Saturday. Family picnic turn into mini-sport day; beach look like cricket ground; and line by KFC longer than de cash grant registration line.
A pastor complain to dem boys how he congregation dwindling. He seh he competing with brunch buffet, picnic and going to de creek and cinema. He seh he might have to start serving waffles and fried rice during service to pull de crowd back.
Dem boys seh life change. People seh dey hustle whole week, so dey deserve to enjoy Sunday. But dem boys seh how Sunday hustle taking away de joy. Imagine people working Sunday like it’s a weekday—where de rest? Lionel Richie wouldn’t recognize this Sunday.
One man seh de only difference now between Sunday and de other days is school closed. But dem boys seh if de pace continue, dem might start school Sunday too. Imagine teachers marking homework by de market and students doing assignment by de car wash.
So, Lionel Richie, sorry buddy. In Guyana, Sunday ain’t easy no more. You might have to change de song to, “Busy like Sunday morning.”
Talk half. Leff half
Related
Similar Articles
