De perfect man
Dec 15, 2024
Kaieteur News- Dem boys seh a man jump in a taxi by de corner and de driver seh, “Bai, you got timing just like Frank.”
De man ask, “Frank who?”
De driver seh, “Frank de man who never mek a mistake in he life!”
De man seh, “Everybody does slip up some time.”
De driver seh, “Not Frank! That man was perfect. He coulda run marathon and win. He play cricket and bat like Shiv Chanderpaul and bowl like Walsh. He coulda sing like Eddie Grant and waltz like he own Pegasus ballroom. And de piano? Oh gosh, Frank use to mek it sing sweeter than steelpan on Mash Day.”
De man seh, “Frank sound like he was one of a kind.”
De driver seh, “Wait, me ain’t done. Frank brain was sharper than de Minister budget speech. De man remember everybody birthday, anniversary, and even dem lil small thing like who drink Coke and who prefer beer. He could fix anything. Me? I try fuh change one bulb and blackout de whole street. But Frank? He coulda fix a plane while it still flying!”
De man seh, “Frank really sound like a miracle.”
De driver seh, “And Frank know every shortcut in Georgetown. Traffic jam? Not fuh Frank. He always reach he destination before time. Plus, he treat women like royalty. Never raise he voice, even if she wrang. And de man dress? Sharp like cutlass—shoes always shining like a police footwear on parade day.”
De man seh, “So where Frank deh now? You know him good?”
De driver seh, “Nah, me never meet Frank. He dead. And me marry he wife.”
Talk half. Leff half.
(De perfect man)
Related
Similar Articles
