Leak like a sieve!
Jan 26, 2025
Kaieteur News- Dem boys know pipe does get leak. You might wake up and find a swimming pool in yuh kitchen. Sink does leak too, and next thing yuh footing full of water. Water bottle does leak, especially de cheap ones that does wet up yuh handbag. Roof does get leak when rain fall heavy, and umbrella does get hole just when yuh need it most.
But de leak dat have everybody ducking and hiding is when tax records does get leak. One minute yuh living quiet, de next thing everybody know how much money pass through yuh account.
Dem boys seh it got people who does quake when dem hear de word “audit.” All of a sudden, dem “investments” start lookin’ like a cover-up. Yuh hear talk how some man build mansion pon lil clerk salary. Dem ain’t tek no loan; dem tek we for fool!
But hear de joke: some big ones don’t pay tax at all! Dem don’t got to worry about no tax leak because dem ain’t got no tax to leak. Dem boys seh dem big ones like Houdini — dey mek tax disappear. And if Revenue Authority man even think to check, he might find heself transferred faster than de speed of light.
Meanwhile, lil man paying tax steady, and if he even miss a lil bit, dem knocking at he door. Dem big ones, though, does call “tax exemption.” And what dem exempting from? Everything!
Dem boys she, de real leak is not yuh roof or yuh pipe; de real leak is de system. It got big hole where de big ones does sneak out, while de small man squeezing to mek ends meet.
So next time yuh hear about a leak, check if it is yuh umbrella or yuh neighbour’s mansion budget. One thing sure — some people ain’t wetting, because dey always dry and scot-free!
Talk half. Leff half.
(Leak like a sieve!)
Related
Similar Articles
