Aug 25, 2025
Kaieteur News – Some Venezuelan boys wukkin in Guyana get catch up in big mix-up. Dem man hear “freeness,” and dem eyes light up. Somebody hand dem a bag of bright red jersey, and dem man ain’t even wait to ask question. Each ah dem collect four—one fuh Monday, one fuh Tuesday, one fuh Wednesday, and one fuh Thursday. Friday? Well, dem still deciding.
Whole week dem boys deh pon de wuksite look like marching band—red, red, red. One ah dem seh, “Boss, this is de best job bonus we ever get—fresh clothes every day!” Dem ain’t know seh “Vote PPPC” print big big pon de chest. To dem, was just style.
Is only when some Guyanese pass and seh, “Ow, y’all campaigning early?” that de Venezuelan boys start scratch dem head. Dem nah talk English too good, but dem know “campaign” sound serious. Dem boys explain: “Buddy, y’all walking billboard for PPPC.”
Quick-quick, dem Venezuelan man pull out dem jersey like it hot. One time, jersey turn inside out. One ah dem seh, “We want de freeness, but we ain’t want no politics. We come to work, not to vote.”
So if per chance, yuh driving by and see fellas in red jersey inside out, don’t think dem crazy or inventing new style. Is just de free PPPC jersey turn upside down. Dem man wnat de jersey but dem nah want be no advertisement fu no political party. So dem wearing de jersey inside out because dem seh it does be comfortable to work in.
Dem boys seh PPPC real clever—giving away jersey to people who can’t even read de slogan. Is like giving a man Chinese food menu in Portuguese. He gon collect it, but he ain’t got clue wah inside.
Politics sweet in Guyana. Jersey free, rum free, lil change free. But when de freeness done, de bill come due. Dem Venezuelan boys smarter than nuff Guyanese. Dem hold on to de freeness, but dem ain’t letting nobody use dem as political poster.
Dem boys seh—red nice, but not when it tie you to a party yuh don’t even know how to spell.
Talk half. Leff half
Similar Articles
