Oct 14, 2025
Dem Boys Seh, Features / Columnists

---

(Kaieteur News) – Yuh ever see milk before it boil? All de cream does rise to de top. Well, that is Guyana fuh yuh. De rich does rise, and de poor does get scorch at de bottom.

Now we hearing a man pon social media advertising how he buying house lots for cash. Not cheque, not bank transfer — straight-up cash, like he running a money museum or planning to pave de East Bank wid $1,000 bills. Imagine house lots going fuh ten, fifteen million dollars, and man walking wid a plastic bag full of greenbacks saying, “Bring yuh transport.” Only in Guyana, bai!

De man so proud, he ain’t even hiding it. In any other country, people woulda whisper them kinda business. But not here. Here, yuh boast. Yuh show off. Yuh make TikTok videos wid de money pile higher than yuh morals.

Meanwhile, de business class — them big ones who drinking imported water and calling it “hydration therapy” — gobbling up land faster than termites in a lumber yard. De government sharing out house lots fuh citizens to build a lil’ home, but de hustlers done turn de system into de new gold rush.

Dem boys hear ‘bout one family who migrate. Government give dem a house lot at $1.2 million. Dem never build a fowl pen pon it, far less a house. Next thing, dem sell it for $15 million through one of them fancy “irrevocable power of attorney” deals. That’s just a legal way of saying, “I done gone, but meh wallet still working.” Dem mek a killing and ship de money overseas faster than a barrel heading to America. And de man ah buy the land gat more land than he got fingers and toes.

That’s de new business model: get land cheap, sit down, wait fuh government build road and light, then sell it like real estate tycoon. Is not house lot anymore — is cash cow lot. And while de rich counting deir millions, de poor people counting de days ‘til payday. A man advertise a two-bedroom unfurnished house fuh $150,000 a month rent. Unfurnished, bai! Yuh still gotta buy stove, bed, and curtain. After paying rent, wah left fuh food, light bill, and school uniform? Yuh belly gon be echoing louder than soca music on Mash Day.

So when yuh see de property market booming, don’t get confuse. It ain’t development — it’s speculation. Is people turning government’s housing programme into a stock exchange, and poor folks getting push further and further out.

Dem boys seh, Guyana turning into de place where de rich does cream off de top, de middle-class does borrow to stay afloat, and de poor — well, dem does just hope fuh a lil’ shelter before another “cash buyer” come knocking.

Talk half. Leff half.

---

---