Careful how you look into de mirror!
Dec 10, 2024
Kaieteur News- Dem boys seh, once upon a time, deh had a government minister who decide he gon go to de doctor fuh a full checkup. De man walk in de office looking like he just lose he best friend and all he money at same time.
He look really down in de dumps. It was just left fuh he cry. He sit down, hold he head in he hand, and tell de doctor, “Doc, I in a bad state. Every time I look in de mirror, I feel like cryin’. Meh belly sagging like a hammock, meh face full of blotches like it tek sandblast, and meh losing meh hair on meh head in handfuls. Doc, I looking ugly bad and out of shape. Wah yuh think wrong wid me?”
De doctor sit down, watch he good, and then seh, “Honestly, I ain’t sure wah wrong wid yuh, but one ting I can tell yuh: yuh eyesight perfect!”
Dem boys seh, de minister lef de office more vex than when he walk in. De man seh, “Imagine I pay all dis money fuh hear dat!”
But de truth is, dis minister ain’t need no doctor fuh tell he wah wrong. He need some good old common sense and maybe a new mirror! Dem boys seh, some people does look everywhere else fuh de problem, but dem can’t handle de truth when it right in front dem face—literally!
So if yuh see yuh reflection looking rough, don’t blame de mirror. And if yuh can’t handle de answer, don’t ask de question!
Talk half. Leff half.
(Careful how you look into de mirror!)
Related
Similar Articles
