Don Qui-Xenophobia fighting shadows
Mar 01, 2025
Kaieteur News- Dem boys seh a certain big man so frighten fuh lose control that he start seeing enemies in he own shadow. Every night, he wake up in cold sweat, thinking one a he own people gon flip. Dem man ain’t even got no real constituency, but big man still obsessing.
One time, dem boys hear he was watching a documentary on Don Quixote, de man who fight windmill thinking it was giant. Next thing yuh know, big man start lashin’ out left, right, and center—calling everybody who blink too much a traitor. He see a man sneeze and nearly call a press conference fuh expose “subversive forces trying to undermine democracy.”
Is like he lose he sense of composure. One day, he shouting bout how some lil party without no seat gon tek he seat. Next day, he cussing out NGO man who ain’t even run fuh elections. De man so paranoid, if a leaf drop outside he office, he sending fuh security review de CCTV.
Dem boys seh he used to be cool, calm, and collected. Now he more like a man drinking five cups of coffee and reading conspiracy theories before breakfast. He calling people names, chasing ghosts, and picking fight wid everybody—even dem who just minding dem own business.
One time, a journalist ask he why he so worried bout people who ain’t got no power. Big man seh, “Is not dem I fraid, is de perception!” Imagine dat! De man fighting perception like how Don Quixote fight windmill. Next ting yuh know, he gon try put restraining order pon de breeze!
Dem boys seh, when yuh got a one-seat majority, yuh does sleep light. But if yuh start fighting windmill, next thing yuh know, de wind gon blow yuh away!
Talk half. Leff half.
(Don Qui-Xenophobia fighting shadows)
Related
Similar Articles
