Don’t tek crank and prank
Mar 21, 2025
Kaieteur News- Some people does like to prank odder people. But nuff times de prank does backfire pon dem!
One time, one woman decide fuh prank she husband. She lef’ a note pon de table seh she gone and she ain’t coming back. But instead of leaving, she hide under de bed fuh see how he gon react.
De man come home, read de note, scratch he head, and tek out a pen. He write something on de note, change he clothes, and start singing like he just win de lotto.
Next thing, he pull out he phone, dial a number and begin to talk loudly, “Babes, me coming over. Thank God meh wife gone by she mother! Me been suffering too long. If me did meet you first, life woulda been sweet.” Then he walk out de house whistling.
De wife under de bed. She  feelings get hurt. She start cry, tears streaming down her face. She crawl out from under de bed, start packing she clothes, seh she married to a traitor. But when she wipe she tears and look at de note, she nearly faint.
It read: “Yuh big toe showing under de bed, dummy. Me gone buy groceries. Yuh got enough time fuh wipe yuh tears before me come back.”
On Wednesday deh had people mekkin’ prank calls to de fire service. De fire tenders running all over de city, looking fuh  fire wah nah deh.
Somebody had a good laugh. But dat laugh gan soon turn into tears. Because de police gan track de numbers from where de prank calls come Dem gan arrest de culprits and put them in front de court. Some people gan end up crying, like de woman wah try fuh prank she husband.
Talk half. Leff half
(Don’t tek crank and prank)
Related
Similar Articles
