Guyana pot boil, but we only get de steam!
Feb 12, 2025
Kaieteur News-Dem boys hear how Guyana mekking one big pot of cook-up. A nice, bubbling, rich pot, full ah everything—oil, gas, gold, you name it. But before de thing even done cook, dem oil company boys come wid dem big spoon and start dip out de best part. Not just one, two spoon, but dem tek way de whole pot! Carry am straight to dem yard and lef we wid one lil enamel bowl wid couple spoonful inside.
But de story ain’t done deh. Yuh see, before de ordinary man get to taste de likkle leff-over, dem big ones in high place decide dem want first pick. So dem dive in wid fork and knife, chop out de chicken, dig out de beef, scoop out de shrimp, and leff back what? Some half-cooked rice and two dry peas.
Now, de people watching all dis, and dem start fuh grumble. “Ow, wha happen to de meat?” But dem leaders smile and tell we, “Look how much nice gravy deh in de pot!” Meanwhile, dem boys dem done full dem belly and tek off, leaving we to sop up de leff-over.
And hear dis—when people seh dem hungry, dem same leaders tun back and seh, “Man, y’all greedy! Look, we giving cash grant fuh buy lil salt and ketchup. Put dat in de cook-up and it gon taste better!”
Meanwhile, dem oil company boys sending shipment after shipment overseas, belly full, laughing at how easy Guyana full dem pot. Dem done tek de best meat and leff we licking de spoon. Dem boys seh, is like we cooking a whole Sunday pot, but by de time we ready to eat, all we gettin’ is de scent. Guyana, me brethren, we smelling nice, but we belly still empty!
Talk half. Leff half
(Guyana pot boil, but we only get de steam!)
Related
Similar Articles
