GUYLINES come back!
Mar 05, 2025
Kaieteur News- Long, long ago, when sugar was sweet and rice bin cheap, Guyanese had one thing in common—GUYLINES! People used to line up fuh everything. Yuh wake up early fuh join a line fuh bread. Yuh spend lunchtime in a line fuh cooking oil. And before yuh go home, yuh in another line fuh cooking gas. If yuh see a line, yuh join it, then ask, “Whah dis fuh?” Just in case is something yuh need.
Dem days, people did know yuh status based on de kinda line yuh in. De rich line up at foreign embassy fuh visa. De middle class line up at GTC fuh telephone. And de poor? Dem bin in every other line, hoping deh still get something when dem reach de front.
Well, dem boys did think de days of lining up was over. But bai, dem was wrong! A man remind dem boys dat de present government bringing back GUYLINES in style!
Yuh want cash grant? Line up! Yuh want old-age pension? Line up! Yuh want meet politician at Freedom House? Line up! Now is a whole new generation learning de fine art of lining up. Is like a national sport! De difference now is when yuh done line up fuh de cash grant cheque, yuh got to join another line at de bank.
Dem boys seh Guyanese lining up so much nowadays, dem think is back to dem hard days. Some seh is progress. Dem boys seh is déjà vu!
At dis rate, next thing yuh know, dem gon tell yuh fuh line up fuh flour and kerosene again. Dem boys hope yuh saving yuh spot in de line from now!
Talk half. Leff half.
GUYLINES come back!)
Related
Similar Articles
