Jagdeo deh ‘thinging and thinging’
Apr 13, 2025
Kaieteur News- Dem boys seh Facebook now is de new Parliament. And de latest MP is a young lady who jump pon a live video fuh defend de Mohammeds.
She seh people must leff dem alone, because de Vice President always “thinging and thinging.” Yes, yuh hear right — not thinking, not doing, but thinging.
Dem boys seh dem been trying whole week to figure out wah is this “thinging.” Is it a dance move? Is it a government policy? Is it a new app?
One man seh “thinging” is when yuh pretending. Another seh is when yuh bluffing. Yet another man seh is when yuh go in office, call a press conference, talk nuff long-winded story, then go home — that’s classic thinging.
Jagdeo is a master of it. He don’t talk, he “thing.” He don’t answer, he “thing.” He don’t explain nothing straight — just loop de loop, zig-zag, duck, and “thinging” all de way.
Dem boys seh de only real “thing” Jagdeo doin’ is thinging up a storm of confusion. One minute he defending. Next minute he vex people asking question. Then de next minute he smiling. That’s advanced “thinging” — PhD level.
De girl seh de man always ‘thinging and thinging.” Well yes! We agree. He thinging so much, he probably don’t even know wah he was supposed to be doing in de first place.
Dem boys seh if “thinging” was an Olympic sport, Jagdeo woulda done collect gold, silver, and bronze.
Meanwhile, de country suffering — cost-of-living high, and people studying how dem gan afford dem meal if Trumo reimpose dem tariffs. But never mind that — de Vice President “thinging.”
Dem boys seh it got time fuh thinking, it got time fuh doing. But this non-stop “thinging” got people dizzy and de country spinning in circles. All week is just “thinging and thinging”. And not a damn thing doing.
Talk half, leff half.
Related
Similar Articles
