Monkey does know which limb fuh jump pon!
Apr 03, 2025
Kaieteur News- Dem boys always hear de old people seh, “Monkey does know which limb fuh jump pon.” But dem never know how true it is ‘til now! De PPPC boys dem got a PhD in monkey business, because dem know exactly which limb fuh jump pon and which one fuh stay quiet like church mouse.
When AZMO land in dem PPPC strongholds, de place tun war zone. Dem let loose de dogs of disruption, hollering, ridiculing, insulting, and making bare commotion. If dem had de chance, dem mighta even pelt one or two plantain at he. De scene look like one of dem protest rally—loud, dramatic, and full of bacchanal. All because de man come fuh talk to people!
But check wah happen when he step into Opposition territory. When AZMO reach in Edinburgh and Kwakwani, de same PPPC stay quiet like if dem throat stitch up. No big bad protests. No wild noise. Dem boys seh de PPPC got one special map—one side mark “Raise Hell Here,” and de other side mark “Stay Far and Act Innocent.”
And if yuh think is just a coincidence, check out Manchester. Dem had lil mumbling and grumbling, but de big bad protest energy suddenly disappear. Wah happen to all de loudmouth warriors from before? Monkey does know which limb fuh jump pon, and de PPPC boys know where fuh get vex and where fuh play deaf and dumb.
Dem boys seh if AZMO really want peace, all he gotta do is visit de right places. De PPPC only like fight where dem think dem in charge. But when dem step in opposition ground, dem does suddenly remember how fuh behave.
One thing certain—de PPPC got more strategies than a chess grandmaster. But Guyanese watching, and dem know de game. Monkey business can’t fool everybody all de time!
Talk half. Leff half.
Related
Similar Articles
