PPP love division more than dem love power
Mar 29, 2025
Kaieteur News- Dem boys seh PPP seh dem ain’t frighten nobody, but yet dem behaving like a cat when dog barking. One man decide fuh hold a lil meeting in a village and before yuh know it, PPP send out dem troops like if war declare.
If y’all don’t business wid de man, why y’all sending picket line and chanting like if is an exorcism? Why de noise? If he talking foolishness, people gon laugh and walk away. But no, dem boys seh PPP got a problem—dem don’t like people talking unless is dem doing de talking.
Long time people in dis country live like family. But now PPP dividing people like a Sunday pot of cook-up—one side fuh dem, one side fuh who against dem. And if yuh cross over, yuh might get bunn rice fuh dinner.
And what about dem 10-days workers? Dem boys seh is not wuk, is political props. Yuh sign up fuh clean de drain but end up at a protest with a placard yuh didn’t write. Labour law say no wukman should wuk under duress, but look story—PPP got dem chanting like if salary paying by volume.
Dem boys seh is a real joke—government seh dem care bout workers, but dem using de same workers fuh mek mischief. Is like buying yuh own birthday cake and still waiting fuh somebody surprise yuh.
People need fuh wake up and smell de corruption. Stop mekking politicians use y’all like old election posters—stick yuh up when dem need yuh and dump yuh after.
And if PPP really believe people love dem, let people talk. If yuh only popular when yuh stop people from listening to others, then yuh ain’t popular—yuh just loud.
Dem boys seh, when yuh frighten de truth, yuh does holler de loudest!
Talk half. Leff half
Related
Similar Articles
