Sep 27, 2025
Kaieteur News – Dem boys seh trade plates was never suppose to be free pass fuh every man and he dawg pon de road. Deh was invent fuh one simple ting—when a man deh at a car dealer and he eye ketch a shiny ride, he could tek a lil spin before he sign he life away wid loan and instalment. But now? Trade plates turn into licence fuh do as yuh please.
Dem boys see one truck load wid sand, dust flying like Sahara, and pon de back? Trade plate hanging like Christmas decoration. Which customer gon test drive a truck full a sand? Unless dem planning to buy de truck, de sand, and de quarry one time.
Next ting yuh know, dem boys gon see a minibus wid trade plate, hustling passenger from Berbice to GT, conductor hanging outside shouting, “Only trade plate inside!” Dem boys wouldn’t be surprise if soon dem see hearse wid trade plate, carrying load from de hospital to de burial ground—because apparently every vehicle in Guyana suddenly under test drive.
De truth is, trade plate system getting abuse left, right and centre. Dealers, hustlers and fly-by-night operators using it like is all-access pass. Nobody checking, nobody asking question. And is de taxpayers who getting play for fool, because while some people paying all de fees fuh registration, others cruising scot-free pon “temporary” plates that turn permanent.
Dem boys seh is time fuh clamp down pon this nonsense. Trade plates should come wid strict rules—short time use, limited distance, and only genuine customers behind de wheel. Not no trucker hauling half a quarry, not no rice farmer tekking load fuh market, and certainly not no minibus hustling schoolchildren.
If de authorities don’t tighten up, trade plates gon become de new national ID card—everybody got one, everybody flashing it, and everybody abusing it. Dem boys seh regulate it, before de whole system turn one big joke.
Talk half. Leff half.
Discover more from Kaieteur News
Subscribe to get the latest posts sent to your email.
Similar Articles
