Uncle Sam want y’all pack yuh grip and come home
Jun 12, 2025
Dem Boys Seh…
Kaieteur News – Dem boys seh Uncle Sam finally tun Uncle Scarecrow! He done send out one big, fat warning shot across de Atlantic—“All illegal Guyanese in America, pack yuh two-barrel suitcase and come home, or else!”
Yuh hear dat? “Or else!” And when America seh “or else,” it ain’t no Sunday school threat. Is like when yuh mother use to seh, “Try me!”—and if yuh did try she, yuh see stars before bedtime.
Dem boys seh de message clear-clear now: it nah matter if yuh overstayed fuh two months or twenty years, if yuh jump fence or slip through Miami like Vaseline, de time reach fuh go back where yuh come from—or Uncle Sam gon come fuh yuh. And not with flowers and roti. Is with handcuff and one-way ticket.
People in Brooklyn ducking and diving. Some faking American accent—“Aye’m nawt from Guy-yana, I’m from Jamaica.” Others deleting Facebook posts with cook-up and Guyanese flag. But dem boys know, US Homeland Security got better records than de Passport Office in GT. Yuh cyah hide behind Auntie couch anymore.
And hear this—dem boys seh some big names might get ketch in de dragnet. One man who does live big in New York might gat to explain how he manage to send home 40 barrels a year, but never step foot back in de country. A woman who does know every government official business and dem alleged indiscretions might soon find out of serious it is to be out of status.
Is serious business. Uncle Sam now done wid de criminals. He coming now fuh de quiet illegals—the one who does go church every Sunday, send money fuh Auntie, and still owe de GRA.
So dem boys seh if yuh illegal and yuh reading this from a basement in the Big Apple—better start brushing up on how fuh cross de Demerara Harbour Bridge in traffic. Home sweet home calling, and not by choice.
America seh come home… before dem bring yuh home!
Talk half. Leff half
Related
Similar Articles
